Балқаштық ветеринарлар ереже бұзған 3 жануар иесіне айыппұл салды

Ветеринарлар жыл басынан бері ереже бұзған 3 жануар иесіне айыппұл салған. Қорадағы малын сойып оны өткізбек болған саудагерлер етке сараптама жасатпаған. Сол үшін де мемлекеттің бюджетке 130 мың теңге төлеуге мәжбүр болды. Ал, ветеринар дәрігерлер болса төрт-түлікке екпе салу жұмыстарын жалғастыруда. Көктемнен бастап осы уақытқа дейін 3 мың бас ірі-қараға, бес мыңға жуық ұсақ малға сібір жарасы және құтырмаға қарсы вакцина егілген. Бұл тізімде 200 жылқы, 450 шошқа мен 70 түйе және 450 ит бар. Сонымен бірге, 8 мың жануар бруцеллез ауруына тексерілген. Оның нәтижесі бойынша ешқандай инфекциялық дерт анықталмаған. Мұндай тексерістер күз айының ортасына дейін жалғасады. Ол үшін бюджеттен 8 млн теңге бөлініпті.

Самат Молдаханов – ветеринария бөлімінің жетекшісі
«Күнделікті бақылау жүргізілуде. Орталық базарда, мал соятын базарда күнделікті жүрігіземіз. Мал өнімдерін сататын дүкен, кафе, ресторандарды тексеру жоспары барлығы жасалған. Уақытылы барлық тексерістер жүргізілуде».